(BURCO): Daadadkii dhawaanta jiidhay magaalada Burco ayaa bannaanka u soo saaray 3 xabaal-wadareed oo ay ku jiraan qalfoofka boqollaal ruux oo ay xasuuqeen dad ka soo jeeda Puntland, Soomaali Galbeed iyo Koonfurta Sool.

Dadkan lafahooda la helay maaha dad hadda dhintay ee waa kuwa la ogaa in lagu xasuuqay dagaalkii cidhibtirka ee 1981 -1990kii ka socday Somaliland ee ay ku kacayeen dad hebel iyo hebel loo yaqaan oo qaarkood maanta Somaliland mansabyo kala duwan ka hayaan. Waxa xitaa la garanayaa dadkaas maalintii la xasuuqay, ciddii xasuuqday iyo halka lagu xasuuqayba. Waa dad eheladoodii magacyo u lahaa Eebbena u xisaabsan laakiin ay indhow-garatadu malaa maanta ku baraarugtay.

Awel miyaan la odhan Shacabka Somaliland 1991 kii bay go'aansadeen inay iska illaawaan boqollaalkii kun ee caruurta, cirroolaha, iyo haweenkaba isugu jiray ee magac dawladeed loogu soo gabbaday sida bahalnimada ah ee aan kala sooca lahayna rasaasta loola dhacay. Maxaa keenay qaylada maanta! Ma naf baa lagu soo celinayaa mise xiniinyo aan kuwii hore ahayn bay kuu siyaadinaysaa oo hiilkoodaad doondooni. Hadday tan danbe dhab tahay, kugu qaadan mayso 5 daqiiqo inaad hesho ciddii falkan geysatay deriskaaga inay yihiinna waaba laga yaabaa.

Kama werwersani wixii iga dhintay oo 1991kii markii fal ii ekaa ayaa anoon awood waayin aan aarsan-kari-waa is qoray, laakiin waxa taas igaga daran in maanta dadkii dilkaas geystey oo magac dawladeed sheeganayaa ay doonayaan inay intii hadhayna is raaciyeen iyadoo jaahiliinta Somaliland caabuddaana ay dadka ku maaweeliyaan Maxaakiim baa na laysay iyo way na qabsanayaan! Miyaynaan la mid ahayn shabeelkii yidhi "Dhashaydii geel ma laynoo waan garanayaa Giiraa (ri) laysay". Sidaa maanta tihiin Maxaakiimtu asxaanbayba idiin samaynaysaa hadday intiinna hadhay badbaadiso oo diinta ku xukumaan.

Dadkan si sharaf leh ha loo aaso waayo kuwii dilay ma dheera ee waa u dhow yihiin oo weliba ku raaxaysanayaan calaacalkiinna. Haddaan idin odhan lahaa Daahir Riyaale, Qaybe iyo ragga la midka ahina aaskooda ha ka soo qayb galaan bal inay Sorry-na yidhaahdaan, waxan ka baqayaa inay idin geeyaan halkii la geeyey Salaadiintiinii, cuqaashiinii, waxgaradkiinii, halgamaagiinii, siyaasigiinii ee maatada caanaha leh looga dhigay! Haddii cid baryo lagaga soo saarayo xabsina waxaan dhinacyadu mudhxeen Suldaankii idiinku qiimaha badnaa ee yidhi Allaah sharcigiisaan beeshayda u dooray.

Waayeel hadalkiisa summad buu ku dhigtaaye marna kuma aan talin in shakhsi aan denbi lahayn la wax yeelleeyo balse wixii falkaas waxshiga ah  geystey in lagula xisaabtamo oo laga gudo ayaa caqliga suubbani farayaa.

Xasuuqan Ulakac ah