|
 Mogadishu–
Golaha maxkamadaha islaamka Somalia ayaa waxa ay sheegeen in ay
ka xun yihiin kana raali galinayaan Somaliland dhibaatooyinkii iyo
xasuuqii ay u geeysteen maamulkii Militariga ahaa ee xukuumadii
burburtey ee Somalia.
 Warkaas
waxa shaaciyey Sheikh Xasan Dahir Aweys, Gudoomiyaha golaha shuurada
maxaakiimta islaamka somalia. Sheekh Xasan Daahir Aweys oo xalayto
lagu waraystay barnaamijka diiradda Shabelle ayaa sheegay in ay uga
garaabayaan waxa ay tabanayaan ee ka soo gaaray maamulkii Militariga
ahaa ee Somaliland, marka ay suurto gal u
noqotona ay magdhaw ka siinayaan.
Waa markii ugu horreysey ee masuul illaa heerkan ahi uu garawshiinyo
ka bixiyo xasuuqii loo geystey shacabka Somaliland ayadoo inta badan
aan masuuliyiinta koonfurta ka maqalno "Soomaali baa la wada diley".
Waxa uu Sheekhu yidhi "Haatan raali ahaansho ayaan u sii qaddimeynaa
dadka walaalaha aanu nahay ee dhibaatada ka soo gaartay maamulkii
Militariga ahaa ee ku tagri falay awoodda Qaranka".
Golaha maxkamadaha islaamka Somalia ayaa sidoo kale shaaciyay wada
hadal ay la galaan maamulka Somaliland oo ay doonayaan in lagu
turxaan bixiyo waxii horey u dhacay ayna ka wada shaqeeyaan waxii
mustaqbal u ah labada shacab ee walaalaha ah.
Mawqifkan Maxaakiimta ayaa meesha ka saaraya
hadallo dhanka Somaliland qoonsadeen oo ay ku hadaaqeen shakhsiyaad
aan qiimo lahayn oo magaca Maxaakiimta u adeegsada danahooda
qallooca.
Iyadauna Waa markii ugu horreysay oo Maxkamadaha Islaamka ay si toos
ah u shaaciyaan inay wada hadal toos ah la galayaan Jamhuuriyadda
Somaliland oo ka badbaaday fowdadii la dagtay koonfurta Somalia 16
kii sano ee la soo dhaafay.
Source: Shabelle Radio | 
11:00 GMT
