|
(Hargeysa): Suldaanka beesha Muuse Dheriye
Suldaan Naasir Suldaan Cabdi Suldaan Cismaan oo ka mid ah beelaha
Somaliland ee la hayb sooco ayaa beeniyay war lagu baahiyay
shabakada Qaadisiya.com oo ka been sheegay dhacdadii wiil dhallin
yaro ah oo ay sheegeen in lagu gubay Hargeysa. Suldaan Naasir wuxuu
ku tilmaamay inay warkan ka beensheegtay shabakaddaa iyo dadka ka
soo hor jeeda qaranimada Somaliland.
Shabakadda Qaadisiya oo fulisa danaha Cagdheerta diinta ku soo
gabbata ayaa illaa hadda fidisa been ay ku qulaamiyaan shakhsiyaad
ka soo horjeeda Somaliland oo isticmaalaya.
Suldaan Naasir Suldaan Cabdi oo shir jaraa'id
qabtay isaga iyo qoyskii Marxuum Cabdinaasir Siciid Odowaa oo bishii
Ramadaan aakhirkeedii uu ku gubtay dukaan uu hoor hurday. Shirkaa
Jaraa'id oo lagu qabtay Hotelka Xarag wuxuu Suldaanku kaga warramay
arrimo doora oo tani ka mid tahay.
 Suldaanka
oo la hadlayey weriyayaasha ayaa yidhi "Website-ka Qaadisiya
waxaan leeyahay hubsada warkiina,inankayaga {Marxuumka Gubtay}
arintiisa baadhis baa ku socota cidii ay ku cadaatona sharciga ayaa
la horkeenayaa wax cusuriyad ahna nalaguma hayo hadaanu nahay
beelaha Muuse Dheriye.. Aniga beeshayda Muuse Dheriye waa beel ka
mid ah beelaha Somaliland wax dulmi ah oo nalagu hayaa ma jirto
sharciga anaga {Beeshiisa} iyo beelaha kale waanu u simanahay
mawqifkayaguna waa ka cad yahay oo waxaanu u taaganahay ilaalinta
qaranimada Somaliland cidii ku soo xad gudubta qaranimada Somaliland
ka yeeli mayno"
"
Suldaanka oo hadalkiisii sii wata wuxuu kaloo yidhi"Waxaan uga
digayaa kuwa sheegta beelaha laga tirada badan yahay ee dibadaha
jooga anagu hadaanu nahay Muuse Dheriye waxaanu nahay dad reer
Somaliland ah wax tacadi iyo dulmi ah oo naloo geystaana ma jirto.
Haddaba hadaad kuwa dibadaha ka soo hadla tihiin waxan idin leeyahay
sheegta beelihiinna ama ku hadla magaca beelihiina laakiin beesha
Muuse Dheriye waa dad reer Somaliland ah waxay dadka reer Somaliland
qabaana way la qabaan".
Shirkaas Jaraa'id waxa kaloo ka hadlay hooyada marxuumkii dhintay oo
la yidhaahdo Sahra Cumar Cali oo shilkaas wiilkeeda ku dhacay ku
tilmaantay "Maqaadiir Alle".
Rashiid Cabdi Xuseen oo ka mid ah dalladda hay'adda xuquuqal
Insaanka ee "SHUURO", kana soo jeeda qoyska wiilka guriga ku gubtay,
ayaa isna caddeeyey inaan beeshiisa Muuse Dheriyo wax tacaddi ama
dulmi ah lagu haynin sida ay weriyeen dhabakad sheeganaysa inay
tahay mid Islaami ah.
Source: Somaliland Today (Contr. Liibaan Maaweel
Shire) | 
11:00 GMT
